अभ्यास दौऱ्याला जाताय की पिकनिकला; शिवसेना नेत्यांच्या उधळपट्टीवर निलेश राणे संतापले

रत्नागिरी: रत्नागिरी जिल्हा परिषदेतील शिवसेना सदस्यांनी अभ्यास दौऱ्याच्या नावाखाली पैशांची उधळपट्टी केल्याच्या आरोप करत भाजप नेते प्रचंड आक्रमक झाले आहेत. अभ्यास दौऱ्याच्या नावाखाली शिवसेनेचे जिल्हापरिषद सदस्य मध्यप्रदेशात केवळ सहलीसाठी गेले आहेत. दिवाळखोरीच्या मार्गावर असूनही या सहलीसाठी १० लाख रुपयांची उधळपट्टी करण्यात आली. जिल्हा परिषद दिवाळखोरीत असल्याने रस्ते, शाळांसाठी निधीची कमतरता जाणवत आहे. अशा परिस्थितीत शिवसेनेचे सदस्य गरिबांचा पैसा वापरुन सहली काढत आहेत, असा दावा निलेश राणे यांनी केला. या सहलीसाठी शिवसेनेच्या सदस्यांनी जिल्हा परिषदेच्या 10 लाख रुपयांवर डल्ला मारला आहे. जनतेचे पैसे स्वत:च्या सहलीसाठी वापरुन हे सदस्य बिनधास्त फोटोसेशन करत आहेत. आपल्याला भारतरत्न किंवा अर्जुन पुरस्कार मिळाला आहे आणि तो घेण्यासाठी आपण दिल्लीला चाललो आहोत, अशा थाटात शिवसेनेचे सदस्य विमानतळावर वावरत होते. कोणी टी-शर्ट काय घालतंय, हाफ पँट काय घालतंय, तुम्ही अभ्यास दौऱ्यासाठी जात आहात की सहलीला, असा सवाल निलेश राणे यांनी उपस्थित केला. ज्याच्या नावावर साधी एक गुंठा जमीन किंवा शेती नाही, तो माणूसही अभ्यास दौऱ्याच्या नावाने मध्यप्रदेशात गेला आहे. एवढेच नव्हे या दौऱ्यासाठी एखादा जिल्हापरिषद सदस्य उपलब्ध नसेल तर त्याच्याऐवजी मुलगा अभ्यास दौऱ्यात सहभागी झाला आहे. रत्नागिरी जिल्हा परिषदेत कारभार नावाची गोष्ट उरली आहे की नाही, अशा शब्दांत निलेश राणे यांनी आपला संताप व्यक्त केला. रत्नागिरी जिल्हा परिषद तोट्यामध्ये आहे, तिला फायद्यात आणण्यासाठी कुठल्याही योजना किंवा उपक्रम राबवला जात नाही. जिल्हा परिषदेचा निधी हा शिवसेनेच्या सदस्यांना पोसण्यासाठी आहे का? सत्तेत असल्यामुळे शिवसेनेचे नेते सगळं काही चालवून घेत आहेत. या लोकांनी किमान जनभावनेचा तरी विचार केला पाहिजे. विमानतळावर जाऊन आपण टी-शर्ट आणि हाफ पँटमध्ये फोटो काढतो. अशाप्रकारे फोटोसेशन करायला जनतेने आपल्याला निवडून दिले आहे का, याचा विचार शिवसेनेच्या सदस्यांनी केला पाहिजे. आज यांनी मध्यप्रदेशात दौरा काढलाय. उदया हे जनतेच्या पैशावर परदेशात पण दौरा करतील, अशी टीकाही निलेश राणे यांनी केली.

from Ratnagiri News | रत्नागिरी बातमी | Ratnagiri News in Marathi | Ratnagiri Local News - Maharashtra Times https://ift.tt/3rQaCpU
https://ift.tt/3s4GeZ5