Sindhudurg News : पेट्रोल पंपावर चोरी करून 'ते' मुंबईकडे जात होते, करूळ चेकनाक्यावर...

सिंधुदुर्ग: खर्येवाडी येथील सिद्धी ऑटोमोबाइल पेट्रोल पंपावर ५७ हजार रुपयांची चोरी करून मुंबईकडे पळून जाणाऱ्या ५ आरोपींना पोलिसांनी अवघ्या दोन तासांत करुळ तपासणी नाक्यावर ताब्यात घेतले. त्यांच्याकडून ६१ हजार ५५० रुपये रोख, वेगवेगळ्या कंपनीचे ७ लाख ३९ हजार ५०० रुपये किंमतीचे २९ मोबाइल, ४ लाख किंमतीची कार असा एकूण १२ लाख १ हजार ५० रुपये किंमतीचा मुद्देमाल जप्त केला आहे. सकाळी ७.३० वाजताच्या सुमारास खर्येवाडी येथील सिद्धी ऑटोमोबाइल पेट्रोल पंपावर सीएनजी गॅस भरण्याच्या निमित्ताने कारमधून आलेल्या पाच जणांनी पंपावरील ५७ हजार रुपये चोरून मुंबईच्या दिशेने पळ काढल्याची माहिती नियंत्रण कक्षाला मिळाली होती. पोलीस अधीक्षकांनी जिल्ह्यातील सर्व पोलीस ठाणे व तपासणी नाक्यांवरील यंत्रणेला सतर्क केले. वैभववाडीचे पोलीस निरीक्षक अतुल जाधव यांनी प्रथम तपासणी नाक्यावरील अंमलदारांना सतर्क करून बंदोबस्त वाढवला. त्यानंतर ते स्वत: पथकासह रस्त्यावर थांबून तपासणी करत असताना वैभववाडी येथील संभाजी चौक येथे नियंत्रण कक्षाकडून मिळालेल्या माहितीच्या आधारे कार थांबवण्याचा प्रयत्न केला, परंतु ती वेगात कोल्हापूरच्या दिशेने जावू लागल्याने पोलीस निरीक्षक जाधव यांनी क्षणाचा विलंब न करता चालक हरिश्चंद्र जायभाय यांच्या मदतीने पाठलाग केला. त्यानंतर करूळ तपासणी नाक्यावरील अंमलदारांना सतर्क केले. पोलीस कॉन्स्टेबल वसंत कांबळे व समीर तांबे यांनी केलेल्या वाहन अडथळ्याच्या मदतीने कारमधील ५ जणांना ताब्यात घेतले. या कारवाईत विक्रोळी पार्क साईट व घाटकोपर येथील ५ जणांना ताब्यात घेतले. त्यातील दोघे जण हे सराईत गुन्हेगार आहेत. त्यांच्याविरोधात मुंबई व ठाणे येथील विविध पोलीस ठाण्यांत गुन्हे दाखल असल्याची प्राथमिक माहिती मिळाली आहे. या पाच जणांना ४ जानेवारीपर्यंत पोलीस कोठडी देण्यात आली. पोलीस अधीक्षक राजेंद्र दाभाडे, अपर पोलीस अधीक्षक नितीन बगाटे यांच्या मार्गदर्शनाखाली वैभववाडी पोलीस ठाण्याचे प्रभारी अधिकारी अतुल जाधव समीर तांबे, वसंत कांबळे, मारुती साखरे, चालक हरिश्चंद्र जायभाय, मोहन राणे, अजय बिल्पे, राहुल तळसकर, नियंत्रण कक्ष अधिकारी अनिल भिसे, अशिष जामदार, श्रेया लाड यांनी ही कारवाई केली आहे. पुढील तपास पोलीस ठाण्याचे सहायक पोलीस निरीक्षक राजेंद्र हुलावळे करीत आहेत.

from Sindhudurg News | सिंधुदुर्ग बातम्या | Sindhudurg News in Marathi | Sindhudurg Local News - Maharashtra Times https://ift.tt/3FU7xcE
https://ift.tt/3Jy4lp6