Nitesh Rane: आत्मसमर्पण करण्यापूर्वी नितेश राणेंना आली अमित शाहांची आठवण; ट्विट करुन म्हणाले...

सिंधुदुर्ग: संतोष परब हल्ल्याच्या कटात सहभागी असल्याचा ठपका असलेले भाजप आमदार हे थोड्याचवेळात न्यायालयासमोर आत्मसमर्पण करणार आहेत. थोड्याचवेळात नितेश राणे त्यांच्या ओम गणेश बंगल्यावरुन कणकवली फौजदारी न्यायालयाच्या दिशेने रवाना होणार आहेत. त्यापूर्वी नितेश राणे यांनी एक सूचक ट्विट केले आहे. या ट्विटमध्ये अमित शाह आणि पी. चिदंबरम यांचा फोटो दिसत आहे. चिदंबरम देशाचे गृहमंत्री असताना अमित शाह यांना सीबीआयने अटक केली होती. त्यानंतर अमित शाह गृहमंत्री झाले आणि सीबीआयने पी. चिदंबरम यांना अटक केली. समय बलवान है. इन्सान खामोखा गुरुर करत है, असा मजकूर नितेश यांच्या ट्विटमध्ये लिहला आहे. संतोष परब हल्लाप्रकरणात जामिनाच्या प्रतिक्षेत असलेले भाजप आमदार बुधवारी न्यायालयासमोर आत्मसमर्पण करणार आहेत. नितेश राणे यांच्या वकिलांनी ही माहिती दिली. सिंधुदुर्ग सत्र न्यायालयाने मंगळवारी नितेश राणे यांचा अटकपूर्व जामिनाचा अर्ज फेटाळला होता. त्यानंतर नितेश राणे यांनी मुंबई उच्च न्यायालयात धाव घेतली होती. मात्र, हा अर्जही नितेश राणे यांच्याकडून मागे घेण्यात आला आहे. आता ते कणकवली फौजदारी न्यायालयासमोर आत्मसमर्पण करणार आहेत. यावर आता सरकारी पक्षाकडून काय पावलं उचलली जाणार, हे पाहावे लागले. उच्च न्यायालयात नितेश राणेंचे वकील काय म्हणाले? नितेश राणे यांची कणकवली पोलिसांसमोर आत्मसमर्पण करण्याची तयारी असून ते तपासात सहकार्य करणार आहेत. त्यामुळे जामीन अर्ज मागे घेऊ द्यावा, अशी विनंती नितेश यांच्यातर्फे ज्येष्ठ वकील सतीश मानेशिंदे यांनी न्यायमूर्ती चंद्रकांत भडंग यांना केली. न्यायमूर्ती भडंग यांनी ती विनंती मान्य करत अर्ज मागे घेऊ दिला.

from Sindhudurg News | सिंधुदुर्ग बातम्या | Sindhudurg News in Marathi | Sindhudurg Local News - Maharashtra Times https://ift.tt/Xp2S3n8Zf
https://ift.tt/LiXaBOtWl