दापोलीच्या माजी उपनगराध्यक्षा संचिता जोशी शिवसेनेत

दापोली : नगरपंचायतीच्या माजी उपनगराध्यक्षा संचिता जोशी यांनी राष्ट्रवादी काँग्रेसला रामराम ठोकत शिवसेना नेते, माजी पर्यावरण मंत्री रामदास कदम आणि आमदार योगेश कदम यांच्या उपस्थितीत आपल्या कार्यकर्त्यांसह शिवसेनेत जाहीर प्रवेश केला.

यावेळी उपजिल्हा प्रमुख सुधीर कालेकर, शिवसेना महिला आघाडी तालुका संघटीका दिप्ती निखार्गे, शिवसेना दापोली शहर प्रमुख राजेंद्र पेठकर, माजी नगरसेवक सचिन जाधव, दापोली शहर युवती अधिकारी कीर्ती परांजपे, मंगेश गावडे, खेड पंचायत समितीच्या सभापती मानसी महेश जगदाळे, सतिश उर्फ पप्पू चिकणे आदी उपस्थित होते.

आमदार योगेश कदमांचे नेतृत्वच दापोली शहराचा विकास करू शकते अशी आपली धारणा झाली आहे त्यामुळे राष्ट्रवादी कॉंग्रेसचा त्याग करून आपण शिवसेनेची कास धरत आहोत, असे स्पष्ट करत त्यांनी शिवसेना नेते राज्याचे माजी पर्यावरणमंत्री रामदास कदम तसेच आम. योगेश कदम यांच्या उपस्थितीत आपल्या कार्यकत्यांसह शिवसेनेत जाहीर प्रवेश केला.

संचिता जोशी गेल्या निवडणुकीत परवीन शेख यांच्याकडून पराभूत झाल्या होत्या. यावेळी पुन्हा त्या एकमेकांच्या समोर उभ्या राहणार असल्याचं जवळ जवळ निश्चित आहे. फक्त फरक एवढाच आहे की यावेळी मतदारसंघ बदललेला आहे. या निवडणुकीत कोण बाजी मारणार याची उत्सुकता असणार आहे.

राष्ट्रवादी कॉंग्रेसच्या दापोली तालुका ओबीसी सेलच्या अध्यक्षा म्हणून यशस्वी घरा घुरा सांभाळून राष्ट्रवादी कॉंग्रेसचे पक्षीय संघटन बळकट केलेल्या संचिता जोशी या कुशल संघटक तर आहेतच शिवाय प्रशासकीय कामकाजाचे चांगले ज्ञान त्यांना अवगत आहे.